Verdiar var det store temaet på Forskingsdagane i år. Ein festival som strekk seg over heile landet. Forskingsdagane har fokus på formidling av forsking, og viser fram kva mange ulike forskarar jobbar med. Universitetsplassen vart omgjort til eit stort torg, 22. og 23. september, der forskarar frå universitet og høgskular fortalde om forskinga si. Forskingstorget er ein fin stad for forskarar å møte publikum, både små og store.
Kva skjer med familien sine minner dersom hytta må seljast?
Korleis løyser ein spørsmålet om arv?
Og kva har antropologi med hytter å gjere?
Desse og fleire spørsmål satte tankane i sving for besøkande.
Folk var ivrige etter å dele sine hyttehistorier, og mange slo seg ned i godstolane for ein hytteprat. Dei fortalde om deira verdiar til hytta. Om hytta som hyggeleg samlingspunkt for familien og som konflikt og krangel i slekta. Både gleder og sorger!
Hytta har ikkje berre ein økonomisk verdi; det handlar om kjenslemessige verdiar, om minner, familie og tilhøyre til ein stad.
Sjølv om vi er litt inhabile, meiner vi at vår stand var den soleklart finaste. Vi bydde på kaffi & vaflar, hyttebok, gode stolar og fantastisk fjellutsikt. Tenk å få kome på hytta – midt i Oslo!