Først i Albania

Boka «Essential Mathematics for Economic Analysis» er skriven saman med den tidlegare Stanfordøkonomen Peter J. Hammond, og er ei innføring i matematikk for økonomistudentar.

Rett før jul kom boka ut på det noko uvanlege akademiske språket albansk.

- Ein albansk student eg hadde likte opplegget i boka så godt at han tipsa læraren sin i Albania om ho. Det har tatt nokre år, men no er boka utgitt på eit albansk forlag og allereie tatt i bruk ved Universitetet i Tirana, fortel Knut Sydsæter, professor emeritus ved Økonomisk institutt.  

Ikkje kvardagskost

Og dette er ikkje kvardagskost for ein norsk universitetslærar. Eit søk i BIBSYS viser at det knapt finst norske fagbøker utgitt i Albania. Dette inntrykket kan Albania-ekspert Cecilie Endresen stadfeste:

- Eg er temmelig sikker på at dette er den einaste norske fagboka omsett til albansk og utgitt i Albania, seier førstelektor Cecilie Endresen, Albania-ekspert ved Det humanistiske fakultet.

Ho har mellom anna søkt for SV-nytt i det albanske nasjonalbiblioteket.

Fleire på albansk

Det finst rett nok fleire andre SV-forskarar som har fått fagbøker ugitt i andre albansktalande land, men etter det SV-nytt har kjennskap til er ingen av desse utgitt i Albania.

I tillegg har antropolog Thomas Hylland-Eriksen fått utgitt boka "Et langt kaldt land, nesten uten mennesker" i Albania, mynta på barn av utanlandske foreldre som vil lære om Norge.

Sydsæter har med andre ord æra av å vere først med fagbok utgitt i Albania.

Redninga

At det vesle landet på Balkan skulle fatte interesse for ei norsk lærebok i matematikk, trur Sydsæter heng saman med måten dei underviser i matematikk på.

- Det finst mange dyktige matematikarar i Austblokklanda, men dei er ikkje er så gode på å relatere matematikken til økonomifaget. Dei underviser økonomistudentar i matematikk på same måte som dei underviser fysikarar.

Då boka vart utgitt i Ungarn vart den omtala som «redninga» for matematikkleie økonomistudentar, fortel Sydsæter.

Pop med norsk matte

For albanarane er ikkje aleine om å sette pris på Sydsæter si lærebok. Etter at den engelske utgåva kom i 1996 har læreboka mellom anna blitt omsett til tysk, italiensk, ungarsk, tyrkisk, portugisisk og spansk.

- Dersom dette hadde vore ei bok i matematikk for matematikarar hadde den nok ikkje hatt same popularitet, for der finst det mange gode bøker. I matematikk for økonomar derimot, finst det ikkje like mange, avsluttar matematikkprofessoren beskjedent.

Så står det berre att å sjå kva som vert neste språk ut!

 

Av Synnøve Aasland, kommunikasjonsrådgjevar SV